Finne

Finnesloftet må vera frå tida før svartedauden, kanskje frå 1200-talet. Det har vore ein ruvande bygning. Byggjemåten er uvanleg. Første høgda er to jamstore lafta buer med ein smal gang mellom, og på desse buene kviler andre høgda, som er stavbygd. I dette loftet er det ein stor sal fremst, og eit mindre rom bak mot den øvre gavlen. Mykje tyder på at buene har vore matlager, og at det store rommet i andre høgda har vore festsal, kanskje brukt av Mikaelsgildet på Voss i mellomalderen.

Mot slutten av 1800-talet var Finnesloftet mykje til nedfalls. Fortidsminneforeningen kjøpte loftet i 1891 og fekk det restaurert; eitt av dei mest sjeldsynte trehus i Noreg – og i Europa – frå mellomalderen.